এই পৃষ্ঠাটোৰ মুদ্ৰণ সংশোধন কৰা হৈছে
৩৮
শনি চৰিত
শুনিয়া প্ৰাগ্দেশপতি শ্ৰীবৎস ৰাজন।
সমস্ত কাহিনী তৈতে কৰিলা বৰ্ণন॥
যিমত বিৰোধ লক্ষ্মী শনিৰ মাজত।
লক্ষ্মীক বুলিলা শ্ৰেষ্ঠ ন্যায় বিচাৰত॥
যিমতে পৰিলা ৰাজা শনিৰ কোপত।
ৰাজ্যনাশ বনবাস ভৈলা যিবামত॥
চিন্তা সঙ্গে বিচ্ছেদ ভৈলন্ত যেন কৰি।
সমস্ত বৰ্ণাইলা ৰাজা এক এক কৰি॥
বোলন্ত সুৰভি শুনি ৰাজাৰ কাহিনী।
মোহোৰ আশ্ৰমে থাকা তুমি নৃপমনি॥
শনিভয় নাহি ৰাজা আশ্ৰমে আমাৰ।
ইথানত গ্ৰহদোষ নঘটে তোমাৰ॥
যতদিন নঘটে কু-দিন অবসান।
ইথানে কৰিও বাস তুমি মতিমান।
নষ্টৰাজা হৈবে প্ৰাপ্তি শুনা নবৰায়।
চিন্তা সহ মিলন হৈবেক পুনৰায়॥
মোহোৰ দুধাৰা দুগ্ধ ভুঞ্জিয়া থাকিবা।
পূৰ্ব্বৰ অৱস্থা শেষে অৱশ্যে পাইবা॥
যদ্যপি ছাড়িয়া ৰাজা যোৱা ইটো বন।
ঘটাইবেক পুনৰায় শনি অঘটন॥
শুনিয়া শ্ৰীবৎস অতি আনন্দিত ভৈলা।
সুৰভি আশ্ৰমে ৰাজা কতোদিন ৰৈলা॥
