এই পৃষ্ঠাটোৰ বৈধকৰণ হৈছে
২১
শনি চৰিত
বুলিবেক মাছ খাইয়া কৰ প্ৰতাৰণ।
কোনকালে পোৰা মাছ কৰে পলায়ন॥
মৃত্যু সে মঙ্গল মোৰ নাহিকে উপায়।
এহি বুলি কান্দে ৰাণী ইনাই বিনাই॥
শ্ৰীকৃষ্ণ বদতি শুনা ধৰ্ম্ম নৰমনি।
মায়া কৰি পোৰা মাছ হৰিলেক শনি॥
কান্দিয়া কান্দিয়া ৰাণী ৰাজাৰ গোচৰে।
সমস্ত বৃতান্ত নিবেদিল নৰবৰে॥
শুনিয়া হাসিয়া কহে শ্ৰীবৎস ৰাজন।
শুনিলোঁহো আচৰিত ইটো অঘটন॥
হেন কাল শূন্যে থাকে শনি মহামতি।
কহিল আকাশ বাণী শ্ৰীবৎসৰ প্ৰতি॥
ব্যাস বিৰচিত মহাভাৰতৰ কথা।
শুনিলে দুৰ্গতি খণ্ডে নহয় অন্যথা॥
⸻
শ্ৰীবৎসৰ প্ৰতি শনিৰ আকাশ বাণী
শুনৰে অধম শ্ৰীবৎস ৰাজ।
কপট প্ৰবন্ধে দিলিহি লাজ॥
খুজিয়া তোহোত ন্যায় বিচাৰ।
পাইলোঁ অপমান দুঃসহ ভাৰ॥
