এই পৃষ্ঠাটোৰ বৈধকৰণ হৈছে
৯
বৰষুণ
ফাগুনৰ ধুঁৱলি আকাশে
হৃদয় উজাৰি দিলে
মদাৰৰ ফাকুৰে ৰাঙলী
প্ৰকৃতিৰ অধীৰ আবেগ
অতপৰে শান্ত হ’ল,
মন মুক্ত ফৰকাল।
নোৱনী পানীৰে দেহা জিলমিল্
আকাশ ভৰা উজ্জ্বল পোহৰ সাক্ষী
সেউজৰে সূৰুযৰে শুভ দৃষ্টি বিনিময়
সৃষ্টিৰ জৰায়ুত উন্মেষৰ আগলি বতৰা।
বহু উদ্বেগ ভাৱনাৰে চেতনা ধূসৰ,
স্তৰে স্তৰে সঞ্চিত ধুলি মাকতিৰে
হৃদয়ৰ ৰন্ধ্ৰ বন্ধ,
পোহৰৰ সুৰুঙা হেৰাল।
ভিতৰত আত্মাৰ আকুল প্ৰাৰ্থনা—
মাথো এচমকা নীলিম আকাশ
এমুঠি সোণালী স্বপ্ন,
পোহৰে ঢৌৱাই দিব
লহ্ পহ্ সৃষ্টিৰ ফচল
জীৱন উজাৰি নিয়া সেইজাক বৰষুণ কিমান দূৰত?
১৯৭৪ চন।
