এই পৃষ্ঠাটোৰ বৈধকৰণ হৈছে
৭
মৈত্ৰেয়ী সংবাদ
“যেনাহং নামৃতা স্যাম্ কিমহং তেন কুৰ্য্যাম্?”
অলোকৰ অভিযাত্ৰী
হে বিদায়ী স্বামী, প্ৰণমো তোমাক।
সপোনৰ ছয়াময়া, জীৱনৰ মায়া এৰি
তুমি হবা বানপ্ৰস্থী
গুহাৰ এন্ধাৰ ঠেলি জ্বালি দিবা অখণ্ড প্ৰদীপ;
ধৰিত্ৰীয়ে দুচকু মোহাৰি
পাব দেখা জ্যোতি ৰেখা
ইন্দ্ৰিয়ৰ অগোচৰ পৰম সত্যৰ।
আৰু মোৰ বাবে এৰি যাবা
কুটীৰৰ স্নিগ্ধ-ছায়া, গো-সুৱৰ্ণ-নীৱাৰ ভাণ্ডাৰ
ঘেৰি যাক মৰণৰ জয়ডঙ্কা বাজে অবিৰাম?
মোৰ চাতক কণ্ঠত কান্দে হেজাৰ যুগৰ তৃষ্ণা
এই পথে জীৱনৰ প্ৰতিশ্ৰুতি ক'ত?
পাৰহীন বায়ু-সমুদ্ৰত কৰ্পুৰৰ জীৱন বিলাস!
প্ৰাত্যহিক তুচ্চতাৰ পুতলা খেলাৰে
আৰু কতদিন পাহৰিম আত্মাৰ ক্ৰন্দন?
জাগতিকতাৰ জীৰ্ণ শিকলি চিঙি
মন মোৰ উৰি যায়
ৰ’দ জিলমিল কপহুৱা মেঘৰ সিপাৰে ,
ধোঁৱা আৰু সুৰভিৰ—
ৰন্ধনশালাৰ আৰু শয়ন গৃহৰ
পথ-পৰিক্ৰমা এৰি
