এই পৃষ্ঠাটোৰ বৈধকৰণ হৈছে
৫। অঙ্ক।
⸺•⸺
প্ৰথম পট।
(ধৰ্ম্মেশ্বৰৰ ঘৰৰ কাষৰ উলুৱনি চাপৰি)।
ভূতনাথ, মুক্তিনাথ, সোণেশ্বৰ আৰু ফজলুৰ।
ভূতনাথ।—“আমি এইখিনিতে ৰওঁ। মি: ফুকন যাওক, মি: ৰাজখোৱা উলিয়াই আনকগৈ।
মুক্তি।—বাৰু। (প্ৰস্থান)
ফজল।—কিয়, আটাইবিলাক যাওঁচোন। তেওঁৰ ঘৰত বহিবলৈ মুঢ়া-চকীৰ নাটনি নপৰে।
ভুত।—নহয়, তুমি বুজা নাই। অটাইবিলাকক দেখিলে ৰাজখোৱাৰ আইতাকে ভিতৰত কেপ্কেপাই উঠিব; ঘাইকৈ মোক দেখিলে।
সোণেশ্বৰ।—কিয়?
ভুত।—মই হেনো তেওঁৰ লৰাটো দেউ-ভূত নমনা কৰি খ্ৰীষ্টান কৰিব খুজিছোঁ।
ফজল।—কি ভাই, কি খবৰ?
ধৰ্ম্ম।—খবৰ ভালেই।
সোণ।—পিচে, মৰিশালিত খুঁটি পোতা হল জানো?
ধৰ্ম্ম।—(গহীনাই) ওঁ-ওঁ-ওঁ। দেখিলেই লেখিবা নহয়।
ভুত।—বেচ কথা। বৰ সন্তোষ লগা কথা। Thanks (ধৰ্ম্মেশ্বৰৰ হাতত ধৰি শলাগৰ হাত জোকাৰণি দিয়ে)।