এই পৃষ্ঠাটোৰ বৈধকৰণ হৈছে
(২)
ধন্য এই তপস্যাৰ ঠাই
একাগ্ৰতা বিৰাজে মনত।
কৰা কৃপা কৃপাময় অগতিৰ গতি,
দিয়া দেখা কৰিছোঁ কাকূতি।
ধ্যানত নিমগ্ন মই
বাঞ্চা কৰি বৰ দেৱতাৰ
আৰাধিছোঁ বিভূৰ চৰণ।
সুপ্ৰসন্ন হোৱা দয়াময় ,
তুস্ট হোৱা সেৱকৰ প্ৰতি,
সিদ্ধি কৰা কামনা মনৰ।
কল্পনা পটত যেন দেখোঁ বিৰিঞ্চিক
স্থিৰ ভাৱে গহীন প্ৰকৃতি,
মুখত জ্বলন্ত জ্যোতি
দেৱাকৃতি প্ৰসন্ন বদন,
মৰাল গমনে যেন
মোৰ পিনে আহে খোজ কাঢ়ি;
পালেহি ওচৰ মোৰ
মাতিব খুজিছে যেন মোক সাদৰেৰে।
