এই পৃষ্ঠাটোৰ মুদ্ৰণ সংশোধন কৰা হৈছে
৬
বনফুল
(মেলানি মাগিলোঁ আজিলৈ,
নাহোঁ নাহোঁ আৰু কাষলৈ,
আন্ধাৰ পুৰীত থাকি, আন্ধাৰ সপোন দেখি,
আন্ধাৰৰ ছবি আঁকি লই
উৰি উৰি যাওঁ দূৰ লই,
নাহোঁ নাহোঁ আৰু কাষলৈ,
( আমি ) মেলানি মাগিলো আজিলৈ।)
⸻
সমৰ্পণ
কোনোবা জোনাক নিশা,
জুৰীৰ পাৰত তুমি আৰু মই
বুকুত মৰুৰ তৃষা,
কোনোবা জোনাক নিশা ।
সুনীল আকাশ খনি,
তলত কোমল দুবৰি দলিচা
কামত মধুৰ বাণী,
সুনীল আকাশ খনি ।
চকুজুৰি জাপ খালে,
তোমাৰ কোলাৰ মধুৰ পৰশে
শীতল অমিয়া ঢালে,
চকুজুৰি জাপ খালে ।
