এই পৃষ্ঠাটোৰ বৈধকৰণ হৈছে
॥ প্ৰগতিৰ গান॥
(২৩)
আমি অনাখৰী হোজা গাঁৱলীয়া
আমি জানোঁ, আমি এক
আমিতো নেজানোঁ কোনে সিঁচি দিলে
জাতি ধৰ্ম ভেদাভেদ,
কোনেনো কৰিলে আমাৰে সমাজত
বিষময় পৰিবেশ॥
০ ০ ০
ভেদাভেদে আজি পাৰ ভাঙি দিলে
জাতিয়ে জাতিয়ে মৰে,
এই মৃত্যুবাণ কোনেনো সাজিলে
কোনে এই প্ৰশ্ন কৰে?
এই প্ৰশ্নৰ উত্তৰ বিচাৰি
গৱেষণা নকৰিলে
শেষ হৈ যাব এই দেশ॥
০ ০ ০
আমি গাঁৱলীয়া একোকে নেজানোঁ
পণ্ডিত তুমিতো জানা
তোমাৰে হাততে জ্ঞান
(পিছে) জ্ঞানৰে টোপোলা বুকুতে বান্ধি লৈ
দিছানো কিহতে ধ্যান?
যুক্তি তথ্য তোমাৰে হাততে
যিহেতু মগজু আছে,
সেই মগজুৰে শতৰু বিনাশী
সমাজৰ সৰু বৰ জাতিভেদ বিনাশী
বচোৱা আমাৰে দেশ॥
⸺
[৩৬]
