এই পৃষ্ঠাটোৰ মুদ্ৰণ সংশোধন কৰা হৈছে
গীতি-মালা
( ৪২ )
অ’ নাৱৰীয়া, চতত নলগাবি নাও
চতত নলগাবি নাও নাৱৰীয়া,
চতত নলগাবি নাও,
ধলৰ সোঁতে সোঁতে অ’ নাৱৰীয়া,
দে, পাৰি দে, নাও,
বেলি- নৌ পৰোঁতেই, পাবগৈ লাগিব
চেনেহী, চিকুণী গাওঁ।
লুইতৰ বুকুতে ৰান্ধনি বেলিটি,
তিৰ্ বিৰ্, কৰিছে চা,
পাৰৰ ইকৰাণি হালিছে জালিছে,
লাগিছে নাচনী বা।
লুইতত নবহে মন নাৱৰীয়া,
বল ঐ খৰেকৈ যাওঁ,
চেনেহী আই মোৰ পাৰতে আছেহি,
মৰমী মুখ’নি চাওঁ।
⸻