এই পৃষ্ঠাটোৰ বৈধকৰণ হৈছে
পাপৰি
( ৩০ )
ভুল সখি, অতি ভুল, বিৰহ-বেদনা ভুগি।
নাকাটে অকণো কাল, চকুলো নোলায়;
কলিজাৰ একোণত জ্বলিলে চিতাৰ জুই
থাকিম নিতউ তাকে অকলে ফুঁৱাই!
( ৩১ )
জীৱন-তৰণি মোৰ উটি যাব জলধিত
যিদৰে আহিছে উটি কুল হেৰুৱাই,
সাৰথি বিহীন হই যাম গুচি অকলই
মাৰ যোৱা সুৰুযৰ শেষ ছবি চাই!
( ৩২ )
নাভাবিবা সখি তুমি, তোমাৰ গীতৰ ঢৌৱে
ৰোধিৱ পাৰিব মোৰ লক্ষ্যহীন তৰী,
নাভাবিবা বুকুখনি শোকত মলঙি যাব
বিৰহৰ দুখ-তাপ সুঁৱৰি সুঁৱৰি!
[ ১১ ]