এই পৃষ্ঠাটোৰ বৈধকৰণ হৈছে
৪০
নীতিমালা
স্বভাৱ
স্বভাৱ অমূল্য নিধি ৰাখিবা মনত,
স্বভাৱে লোকক তোলে ওখ আসনত।
স্বভাৱে কৰিব পাৰে সকলোকে জয়,
স্বভাৱ বলতে নৰো দেবতুল্য হয়।
দেহৰ শুৱণী যেনে বসন ভূষণ,
স্বভাৱেও কৰে তেনে জীৱ বিতোপন।
স্বভাৱ লগত নাই একোৰে তুলনা,
হয় নে নহয় চোৱাঁ কৰি বিবেচনা।
বিদ্বানে সম্মান পায় বিদ্বাৰ বলত,
প্ৰশংসাও পায় বহু জ্ঞানী সমাজত।
নিখুঁত স্বভাৱ কিন্তু আছে যি জনৰ,
গোটেই সংসাৰে কৰে তেওঁক আদৰ।
স্বভাৱ গুণতে চোৱাঁ তেনে সাধুজন,
লোকৰ বিশ্বাসী আৰু ভক্তিৰ ভাজন।
সমাজ চানেকি তেওঁ পৃথিবী ভূষণ,
মৰিও অমৰ হই থাকিব অমৰণ।
