পৃষ্ঠা:তটিনী তীৰৰ খেলা.pdf/৮০

ৱিকিউৎসৰ পৰা
এই পৃষ্ঠাটোৰ বৈধকৰণ হৈছে

কণ্ঠহাৰৰ সলনি তেওঁ পিন্ধি লৈছে সকলো ধৰ্ষিতা নাৰীৰ শৰীৰৰ দাগ
যাতনাত কাতৰ হ’লে বুলাবলৈ তেওঁৰ মাতৃময়ী হাত
শীতলতা গলাব পৰাকৈ শৰীৰৰ উত্তাপ
কইনাৰ বেশতো তেওঁৰ কেৱল নিৰ্ভীক পোছাক

আমি বৰ্জন কৰিম বিবাহৰ সকলো পৰম্পৰা
ধূপৰ সলনি ৰ’দে পোৰা দেহা
ধৰ্মৰ আৰলত নিধন হ’লে ঈশ্বৰ সাক্ষী থ’ম কাক
পুৰোহিতো নালাগে আপুনি হ’বনে সাক্ষী পঞ্জীয়ক ধৰ্মাৱতাৰ

পৰস্পৰে অস্ত্ৰাঘাত নকৰা মাথো বিশ্বাসৰ মন্ত্ৰ
হোমাগ্নিৰ সলনি জাৰ সেকি বাঁহৰ মূঢ়াৰ জুই
দুখবোৰ পুৰি পকেটত সস্তীয়া চাউলৰ হিচাপ লৈ ওলাই যাম
এদিনলৈ পাহৰিব পাৰিবনে পানীয়ৰ বিলাস খাহী মঙহৰ সোৱাদ

আমি নিমন্ত্ৰণ কৰিম সকলো সন্তানহীন নাৰীক আৰু
তেওঁলোকৰ চকুলোক চলুপাতি গ্ৰহণ কৰিম কাৰুণ্যৰ আশীৰ্বাদ
যথাদিৱসত লগ পোৱাৰ আশাৰে...

(২০০৩)

৮০//তটিনী তীৰৰ খেলা