পৃষ্ঠা:তটিনী তীৰৰ খেলা.pdf/৬৯

কেনেকৈ এৰো বোপাই নাড়ীকটা মজিয়া
কইনা হৈ গৰকা চোতাল
ককাৰ হাতত সুখে-দুখে শতিকা গৰকা ভোতাল
পাৰঘাট নিমাত
উদঙাই চাচোন ঢাকোন তলত পোহৰৰ আৰ্তনাদ

চকুলো মচাৰ আহৰি নাই চাপৰিয়ালৰ দুহাত
বাৰিষা ব’ঠা খৰালি কোৰ-কটাৰী আন্ধাৰে-পোহৰে ঘৰ-বাৰী
ঘাটে সলায় ঘাট সপোন লৈ ঘাটৈয়ে ভাঙে চাপৰিৰ লুংলুঙীয়া বাট

ঘাটে বাটে চিনে সদিচ্ছাৰ বাটৰুৱা মতলবী মন
চাপৰিৰ কোনোবাখিনিত নল হৈ গজে সঞ্জয়ৰ আৰ্তনাদ
সুমিত্ৰাৰ চকুলোত সেমেকি আছে লুহিয়াৰ পাত

সোঁতে উটুৱাই গুচাব নোৱৰা হোলাৰ বিহমেটেকা
নৈক নেওচা দি পাংখাই তোলে পকনীয়া
গধুৰ জোলোঙা বৈ গুছি যায় চহৰতলিৰ পমুৱা
কঁহুৱাৰ কঁকালপোতা বালিতে চাকত ঘূৰে মৰহা আশা

আকৌ টেকেলি পোৰা গোন্ধ
মেলোঁ উজনিমুৱা নাও
ঘাটে চিনে অতিথি আৰু সুবিধাবাদীৰ ভাও

তৰাং পানীত নাও লাগি আন্ধাৰ নামিলে
অচিন ভূগোল পৰুৱাই পোৱা বাট
ঘাটে দেখুৱাব
হাৰিকেনেৰে ঢিমিক্‌-ঢামাক কমলাবাৰী ঘাট

(২০০৩)

তটিনী তীৰৰ খেলা//৬৯