এই পৃষ্ঠাটোৰ বৈধকৰণ হৈছে
প্ৰেম
(এক)
কেনি সোমালোঁ কেনিবা যাম
কেৱল দৌৰিছোঁ অৰণ্যৰ পৰা অৰণ্য
কুঁৱলী মাথো সেউজৰ গৰ্ভজাত
কলিজাত এটা সেমেকা দবাৰ মাত
ভৰিত বিয়নীসাৱটা
কামিজতো কাৰ্শলা বন
হাড়লৈকে কঁপনি কপালত আহাৰ মাহৰ ঘাম
পুৱতিৰ চৰাই মোকো লৈ যাবি
তটিনী তীৰলৈ যাম
(দুই)
উজুটিত নখ ছিগে
কেঁকোৰাঠেঙীয়া বাট
সন্ধ্যাটো তোমাৰ গালত ফুলিলে
মই ভটিয়নীৰ নাৱৰীয়া
চাপৰিতো হেৰুৱাওঁ বাট
(তিনি)
ওন্দোলিলে কাউৰীকণী আকাশ
ওফন্দিলে চিৰিলি নৈ
ঘাটতে মোৰ সন্ধ্যা নামিলে...
পদূলিমুখত সন্ধ্যাতৰাৰ জেতুকা বোলোৱা হাত
ওঁঠ নে বিজুলী মেঘ নে চুলি
বতাহ নে উশাহ
বহাগত বুৰিছোঁ
মনৰ বনত কোমল কুঁহিপাত
নাচনী পৃথিৱীত জুনুকাৰ মাত
৫৮//তটিনী তীৰৰ খেলা
