এই পৃষ্ঠাটোৰ বৈধকৰণ হৈছে
সাধনী
সোণগিৰিত মৰা টিপাই শিপালে
সোৱনশিৰি দিচাঙৰ পাৰ
ৰূপে কি কৰে, কুবেৰকো মেৰাই ধৰে
জৰায়ুত বীৰ, জোলোঙাত ঢাল- তৰোৱাল, সোণৰ মেকুৰী
গিৰি জিনি হাবি ভাঙি ভাঙি
বহলাই পাতিলে বেলি উঠা চোতাল
দেও লাগিলে মনিষে মানিলে
পোহৰৰো নহ'ল আকাল
একাল দুকাল কেইবা কাল
ৰঙা ফোঁট তেজ লগা দা
কেঁচাইখাঁতী গোসাঁনী মোৰ বুলি লোৱা
ৰণত নমৰে পয়মাল
বগা ভাতত কাউৰীৰ নহয় আকাল
সখি পতা দিনত সিন্ধুক্ষেত্ৰত শৱ-দিয়া
‘কেৰকেটুবা মা-লি পকা তামোল খা-লি ..............’
সাধনীৰে বিয়া
ধান নুখুজিবি চাউল নুখুজিবি
কইনা ৰজাঘৰীয়া দৰা কেৰকেটুৱা মৰা
নিতাইৰ পৰা অনীতিৰ বাটেৰে
চকুলো সৰি সৰি পাহাৰত পুখুৰী হ'ল
সাধনী তল গ’ল
বাৰিষা বিনায় পৰ্বতৰ ঢেঁকীয়া
শেলুৱৈ শিলত খাঁজ কটা সাধনীৰ ৰিহা
দেওঘৰৰ পদূলিত শিল
তলত লাওখোলা
গচকি খচকি সৰ্গদেউৰ অহা-যোৱা
দেও গ’ল সৰগো গ’ল
কাৰ কাৰ চাউলকঠা
মুকলি হল?
৪৭
