এই পৃষ্ঠাটোৰ বৈধকৰণ হৈছে
গুৱলা-সাপ
দামুৰি বান্ধি গাখীৰ সাঁচিলোঁ
এমা-ডিমাৰ খৰিকা যেন হাত
আঁউসীৰ ৰাতি দুভৰি ছাটি
শুহি খায় গ’ল গুৱলা-সাপ
চোহোঙা ওহাৰ চুহি চুহি
লঘোনীয়া দেহা বেঁত-মেলা
পাৰিনে ধৰিব মাটিৰ চাকিয়ে গোহালি ৰখি
গুৱলা-সাপ দুমুখীয়া
খায় থকা, চাই থকা
অমৃত আৰু বিষৰ লহলহ জিভা
পিটনি বাঢ়িছে, বাঢ়িছে সাপৰ চোং
চকুৱে চকুৱে সাপৰ ঠেং
শৰীৰে শৰীৰে গুৱলা-সাপৰ জ্বৰ
গাতে বনকৰা চোলা
জোকাৰিছে হাত অভয় মুদ্ৰা
সেন অমৃত-স্পৰ্শী ফণা
আন হাতত বিষবন্যা
সাৰে আছনে, শুই পৰিছ
কি পাম বুলি মাটিকে বেচিছ
ঘামৰ ভাতমুঠি ভাল
নেবেচিবি গাইজনী গৰুহাল
বেচিবলৈ নিদিবি আইজনীৰ কন্যাকাল
২৮
