এই পৃষ্ঠাটোৰ বৈধকৰণ হৈছে
শৰাইঘাট
ঘাট জিনিলেই সুগম নহয় বাট, আৰু কথা থাকে
সিঁচিলেই সজাল নধৰে আহু, বিন্ধনাৰে ফণিয়াব লাগে
মাটিৰ শৰাইঘাট জাতিৰ শৰাইঘাট
তাৰ পৰা একা-বেঁকা দীঘলীয়া বাট
বাটৰ মাজত বহু বাট
বাটে বাটে শৰাইঘাট
পৰুৱাই পাই হেৰুৱায় বাট-ঘাট
প্ৰাণত গানত সাজত লাজত
নাচত লাসত প্ৰেমত ভেমত
কোনে আহি মাৰি লৈছে ৰাজ
দেহ আছে আনৰিয়া দেহ
সাহ আছে বাঁহ আছে
ধান আছে মান আছে
নৈ আছে নাও আছে
তথাপিতো তথাপিতো ........
আত্মকেন্দ্ৰিকতাৰ কুঠৰীত লেটা কুন্দাওঁ
উজোৱাৰ আলস্য, ভটিয়নীত মেলি দিওঁ নাও
হাত আজি আলসূৱা হাত
কাম আছে ঘাম নাই,
স্বপ্ন মাথো অনায়াস গ্ৰহণৰ অনন্ত বাসনা
সেনা আছে, যেন চৰণীয়া গৰুৰ চৌপাশে বগলিৰ জাক
বাটে বাটে শৰাইঘাট ..........
২৬
