এই পৃষ্ঠাটোৰ বৈধকৰণ হৈছে
বন্দন
প্ৰথম অধ্যায়
প্ৰথমে প্ৰণামো দেৱী সৰস্বতী,
দ্বিতীয়ে প্ৰণামো হৰি।
তৃতীয়ে প্ৰণামো গাঁৱৰ বুঢ়া-মাথা,
ধৰি যাওঁ নামৰে গুৰি॥১।
নামৰে কঠিয়া ঈশ্বৰে দিছিল
ব্ৰহ্মায়ে সৰজা নাম৷
বেয়া নাম ওলালে খেমিবা সদৌৱে,
পোনতে পিৰিতি গাম॥২।
পিৰিতি প্ৰাণৰ ধন, ভাবি চোৱাঁ, ঐ মন,
পিৰিতি আন্ধাৰৰ চাকি।
পিৰিতিয়ে নিদিলে দিওঁতা নাইকিয়া,
ভোকৰ ভাত পিয়াহৰ পানী॥৩৷
পিৰিতি ইয়াকুল, পিৰিতি বিয়াকুল,
পিৰিতি গলৰে জৰী।
যিমান মেৰ খুৱাবা সিমান মেৰ খাব,
পিৰিতি নপৰে সৰি॥৪।
পিৰিতি শুদা গুণ, মহঙৰ কেঁচা লোণ৷
থবা যতনেৰে বান্ধি৷
কিবা মায়া কৰি হেৰাব লাগিলে
বিচাৰি নাপাবা কান্দি॥৫৷