এই পৃষ্ঠাটোৰ বৈধকৰণ হৈছে
১২৮
জনকাব্য
ভঁৰালৰ আগতে মইনাৰ তাঁতশালে
চৰায়ে ছিঙিলে সূতা।
ফেকুৰি ফেকুৰি নাকান্দা, মইনা,
আনি দিম বজাৰৰ সূতা॥ ৬৮০।
⸺
পঞ্চত্ৰিংশ অধ্যায়
বিহুতলীৰ নাচনী কোন, সমনীয়া,
বিহুতলীৰ নাচনী কোন।
বিহুতলীৰ নাচনী আমাৰ সৰু ভনী,
খোপাত গুজি- লৈছে সোণ॥ ৬৮১।
পোৱালি কাছৰে চলং, লগৰীয়া,
পোৱালি কাছৰে চলং।
কেনি পাৰ হব আমাৰে নাচনী,
দিখৌত নাইকিয়া দলং॥ ৬৮২।
কোনে দি-এ যাব কাঠৰ দোৰপতি,
কোনে দি-এ যাব মাকো।
কোনে দি-এ যাব দিখৌৰ দলংখনি,
কোনে দি-এ যাব সাঁকো॥ ৬৮৩।
ইটো পৰবতত কুকুৰা কাটিলোঁ,
সিটোত পৰিলেগৈ তেজ।
নাচনীৰ মূৰৰে গুটি ফুলৰ গামচা,
যেন ম’ৰা চৰাইৰ নেজ॥ ৬৮৪।