এই পৃষ্ঠাটোৰ বৈধকৰণ হৈছে
১২৬
জনকাব্য
বজাৰলৈ যোৱাঁগৈ, লংগুটি আনাগৈ,
দুয়ো মঘা মাৰি খাম।
মহৰ শিঙৰ পেঁপাটি বনকাই আনাগৈ,
তোমাৰ লগত বিহুলৈ যাম॥ ৬৭০।
এই বেলি বিহুটি লৰকে-ফৰকে,
গুৰিলৈ টানিলে খৰ।
বিহুৰে নাচনি নৰীয়া পৰিলে,
ঢুলীয়া পৰিলে জ্বৰ॥ ৬৭১।
নগাৰ চাঙতে পেঁপাটি বাজিলে,
ডফলাই বজালে টকা।
জীয়ৰী-বোৱাৰী বিহুতে বলিয়া,
তুমি ক’ৰ বিহুৱা ডেকা॥ ৬৭২।
কলীয়া কচুৰে শিয়া, ঐ বহনা,
কলীয়া কচুৰে শিয়া।
জীয়াই থাকোঁ মানে তোমাৰে তিৰুতা,
বিহুলৈ পঠিয়াই দিয়াঁ॥ ৬৭৩।
কেঁহকলী নিকালী, কপাহ সূতা ক’ত থলি,
ঠেহ পাতি নাখালি ভাত।
এপুৰা সেন্দুৰৰ যোৰ-ফোঁট মাৰিলি,
ৰঙা ৰিহা মেৰালি গাতি॥ ৬৭৪।