এই পৃষ্ঠাটোৰ বৈধকৰণ হৈছে
( ৪০ )
উঠা অসমীয়া, চোৱাঁ চকু মেলি,
পোহৰে পূবত, ভাগ্যৰ বেলি;
অতীত গৌৰৱ সুঁৱৰি ভাই,
উধাৰা অসম দুখুনী আই।
সাহিত্য, সঙ্গীত, জ্ঞান, বিজ্ঞানত,
কৃষি, শিল্প আৰু বেহা-বেপাৰত,
জনমভূমিৰ মুখ উজলাম,
ৰাখিম ধৰাত অসমীয়া নাম।
শুলাঁ বহু দিন উঠাঁ অসমীয়া,
জগৎ জাগিছে উঠাঁচোঁ এতিয়া।
আহ সকলোৱে কৰোঁ এই পণ,
দেশৰ কল্যাণ কৰিম সাধন;
দেশৰ কাৰণে চকুৰে কান্দিম,
দেশৰ কাৰণে মুখেৰে মাতিম;
দেশৰ কাৰণে লিখনী লিখিম,
দেশৰ কাৰণে স্বাৰ্থ তিয়াগিম;
জাতীয় প্ৰেমত সকলো মজিম,
জাতিৰ উন্নতি অৱশ্যে সাধিম;
আই অসমৰ গৌৰৱ বঢ়াম,
‘জয় জন্মভূমি' সকলোৱে গাম;
প্ৰেম-ভকতিক হিয়াত থাপিম,
সত্য সনাতন ধৰ্ম্ম আচৰিম।
