পৃষ্ঠা:জিলিকনি-আনন্দচন্দ্ৰ আগৰৱালা.pdf/৪২

ৱিকিউৎসৰ পৰা
এই পৃষ্ঠাটোৰ বৈধকৰণ হৈছে
 

সুখ।

সুখ সুখ বুলি মানুহ বলিয়া
 নেদেখে সুখৰ মুখ;
সুখ বিচাৰোঁতে পায় সংসাৰত
 দুখৰ উপৰি দুখ।
দেখিও নেদেখা কিয় দিন-কণা,
 সুখ যে হাততে আছে;
যিটে দিব পাৰে স্বাৰ্থ বলিদান,
 সুখ ফুৰে পাছে পাছে।
অকল নিজৰ নিমিত্তে নহয়
 আমাৰ জীৱন ভাই,
পৰৰ কাৰণে খাটিব পাৰিলে
 সংসাৰ সুখৰ ঠাই।
পৰৰ অভাৱ, পৰৰ দুখত,
 হিয়া যদি পমি যায়,
পৰক আপোন কৰিব পাৰিলে,
 সংসাৰত দুখ নাই।
শক্তি-সামৰথ পৰৰ সুখত
 বিলাব পাৰিলে ভাই
পৰৰ কাৰণে কান্দিব জানিলে
 কান্দনতো সুখ পায়।