এই পৃষ্ঠাটোৰ বৈধকৰণ হৈছে
২২
চিন্তানল
জানিবা নিশ্চয় যুজৰ সংসাৰ,
যুজতেইহে জয় লভিব লাগে,
যুজ বিনা কদা প্ৰেম ৰাজ্য পাতি
দেখিছানে সুখ কোনোবাই ভোগে?
এই মৰতৰ বাহিৰ ভিতৰ
মানুহৰ কেৱল যুজৰ ঠাই,
যুজত বিমুখ হলে জীৱনত
মানুহৰ সুখ কণিকাও নাই।
জনম মৰণ নিয়তি নিয়ম
অহা যোৱা খেলা সদায়েই হয়
পাপৰ সহিত কৰিবলৈ যুজ
কিয়নো কৰিবা মিছাতেহে ভয়?
জন্মিছা যেতিয়া মৰণ নিশ্চয়,
দেহ সজাটিৰ থিতাপি নাই,
সংসাৰৰ একো নাসাধি কৰ্ত্তব্য
মানিবা জীৱন বৃথায়েহে যায়।
সেৱক হৈ তুমি জনম লভিছা
মানুহক মাথোঁ দিবলৈহে সুখ
অধৰ্ম্মক খেদি প্ৰেম ৰাজ্য পাতা,
নহবা কদাপি যুজত বিমুখ।
