এই পৃষ্ঠাটোৰ বৈধকৰণ হৈছে
১৮
জঙ্ঘাসুৰ বধ
পতাশালে বন্দী হুয়া আছে বৃকোদৰ।
পাখ-ছাটে উৰুৱালা ৰক্ষা ৰাক্ষসৰ॥
ভীমৰ বন্ধন পক্ষীৰাজে ছিণ্ডিলন্ত।
মুক্ত হুয়া ভীমে গৰুড়ক নমিলন্ত॥ ৭৩
গৰুড়ক বোলে তুমি থাকা এহি থান।
অসুৰৰ কিনো পাওঁ গদা ধনুৰ্ব্বাণ॥
এহিবুলি ভীমসেন অভ্যন্তৰে গৈলা।
দুই ৰথ সহিতে সাৰথি তুলি লৈলা॥ ৭৪
মনত হৰিষ বেগে গৈলা সেহি ছেগে।
গৰুড়ৰ সমীপক গৈলা মহাবেগে॥
নগৰৰ ঠান ভান সমস্তে কহিলা।
শুনি পক্ষীৰাজ তাঙ্ক আশ্বাস কৰিলা॥ ৭৫
অনন্তৰে গৰুড় সহিতে মহাবলী।
যুধিষ্ঠিৰ সমীপক শীঘ্ৰে গৈলা চলি।
জঙ্ঘাসুৰৰ নগৰৰ বৰ্ণনা
মুনিয়ে বোলন্ত ৰাজা শুনা বৰ্ত্তমান।
ৰাক্ষসৰ নগৰৰ কহো ঠান ভান॥ ৭৬
চাৰিদিকে চাৰিখান পৰ্ব্বত আছয়।
অযুত যোজন সিটো উচ্ছৃত হোৱয়॥
বহলে তিনিশত অধিক প্ৰহৰৰ।
তাহাৰ ভিতৰে আছে সাতাগোটা গড়॥ ৭৭
