এই পৃষ্ঠাটোৰ বৈধকৰণ হৈছে
১০
জঙ্ঘাসুৰ বধ
কেহো জনী বোলে অৰে শুনিয়োক বাই।
এক-মুণ্ড-নৰ স্বপনত দেখা নাই॥
এক-মুণ্ড-মনুষ্যক দেখিবাক ভাল।
আমাৰেসে স্বামী সব পৰম জঞ্জাল॥ ৪৭
ৰূপ গুণ দেখি নাৰীগণ মোহ ভৈলা।
নৃপতিক ভয়ে কেহো কাষ নচাপিলা॥
ধৰি বান্ধি ব্যাধে পশু নেই যেনমতে।
পতাশালে থৈলা নিয়া অসংখ্যক দূতে॥ ৪৮
পৰম-উৎসৱ আনন্দৰ সীমা নাই।
অসংখ্যাত ৰক্ষা দিলা বন্দীয়াৰ ঠাই॥
স্নান কৰি মহাৰাজ লভিয়া হৰিষ।
অনন্তৰে শিৱগৃহে ভৈলন্ত প্ৰবেশ॥ ৪৯
হৰক বন্দিয়া ৰাজা ভোজন কৰিলা।
পাত্ৰ মিত্ৰ সমে ৰাজা সভাত বসিলা॥
শুনিয়োক সভাসদ বনপৰ্ব্ব পদ।
একচিত্ত মনে সবে হৈয়া নিশৱদ॥ ৫০
বীৰৰ উপৰে বীৰ কালৰ যে কাল।
সত্বৰে হৰিক ভজা এৰা আল জাল॥
পৰম ভকত জানা পঞ্চ যে পাণ্ডৱ।
ভকতৰ মহিমাক বৰান্ত মাধৱ॥ ৫১
ভাৰ সংহৰিলা সবে হুয়া অৱতাৰ।
এতেকে ভক্তৰ যশ কৰিবা প্ৰচাৰ॥
