এই পৃষ্ঠাটোৰ বৈধকৰণ হৈছে
কৰ্ণ পৰ্ব্ব।
শৰীৰে প্ৰকাশে যাৰ অলঙ্কাৰ শোভা।
চৰণ পঙ্কজ ভকতৰ মনলোভা॥
ভুবন মোহন ৰূপ মদনক জিনি।
যিটো ৰূপ দেখি হৰ বিষ্ময় আপনি॥ ৪॥
যিটো ৰূপ দেখিবাক অপ্ৰায়সে গৈই।
আন এৰি ফুৰে যিটো কৃষ্ণ গুণ গাই॥
সেহি দুই অৰুণ চৰণে মোৰ গতি।
কৰ যোৰ কৰি বোলে ৰাম সৰস্বতী॥ ৫॥
দিয়োক শৰণ কৃষ্ণ নকৰা নৈৰাশ।
কৃপা কৰা তোমাৰ দাসৰো হৈবো দাস॥
শুনিয়োক সৰ্ব্বজন কৰ্ণ পৰ্ব্ব পদ।
যুধিষ্ঠিৰ অৰ্জ্জুনৰ যিমান সম্বাদ॥ ৬॥
প্ৰাণৰ শঙ্কত জানি পশিলা ঘৰত।
যুধিষ্ঠিৰে ভঙ্গ দিলা কৰ্ণৰ শৰত॥
কৃষ্ণে কহিলন্ত পাছে কথা নৃপতিৰ।
শুনি চাহিবাক আইলা ধনঞ্জয়বীৰ॥ ৭॥
যুধিষ্ঠিৰে অজিজ্ঞাসি পাৰিলন্ত গালি।
অৰ্জ্জুনেয়ো ক্ৰোধত খৰ্গক লৈলা তুলি॥
মধ্যে পশি কৃষ্ণে পাছে খণ্ডাইলা দুৰ্গতি।
পদ বন্ধে নিবন্ধিলা ৰাম সৰস্বতী॥ ৮॥
সঞ্জয় বদতি কথা শুনা নৰেশ্বৰ।
অৰ্জ্জুনে সহিতে যুদ্ধ সংসপ্ত দলৰ॥
