এই পৃষ্ঠাটোৰ বৈধকৰণ হৈছে
৪০
কুমৰ-হৰণ
প্ৰৱন্ধে সজাইলা প্ৰভু লৌহময় ঘৰ।
কুমৰক থৈল নিয়া তাহাৰ ভিতৰ॥
উৰ্দ্ধে অধে একোভিতি নাথাকে উশাস।
কুন্দ্ৰাক্ষৰ জালে বজাই উশাস নিশাস॥
বৰ বৰ বীৰগণ দিলন্ত প্ৰহৰী।
সজাগৰে থাকে সবে অস্ত্ৰ-শস্ত্ৰ ধৰি॥
পূৰ্ব্ব দিকে হনুমন্ত বীৰ আছে ৰাখি।
পশ্চিমত ৰাখন্ত গৰুড় মহাপক্ষী॥
দক্ষিণত বলভদ্ৰ উত্তৰত সাম৷
চৌদিকে ৰাখন্ত হৰি নাহিকে বিশ্ৰাম॥
এহিমতে কুমৰক সবে আছে ৰাখি।
সন্ধ্যাকালে সেহি ৰাজ্য পাইলা চিত্ৰলেখি।
আকাশত নিয়া তাই ৰখাইলেক ৰথ।
দ্বাৰকা নগৰে ৰঙ্গে চাহিলা সমস্ত॥
স্বৰ্গতো অধিক দশগুণে প্ৰকাশয়।
নগৰ চাহন্তে চক্ষু চমক লাগয়॥
নানাবিধ ৰঙ্গ দেখিলেক ঠাই ঠাই।
সম্প্ৰতিক নিশাৰ প্ৰহৰ দুই যায়॥
চিত্ৰলেখা ৰথ খান ৰখাইল তহিতে।
নাৰদক সুমৰিয়া বড়ি লৈলা হাতে॥
