এই পৃষ্ঠাটোৰ বৈধকৰণ হৈছে
[ ৪০ ]
দেৱক পিতৃক অৰ্চ্চি অন্নজল খাই।
ঋষিক প্ৰণাম কৰি চলে পঞ্চভাই॥
যুধিষ্ঠিৰ ৰজা যাই কৃষ্ণক সুমৰি।
চাৰি ভাই যাই আৰু দ্ৰুপদ জিয়াৰী॥ ১৬৩
গধুলিকা বেলা যথা তথাতে ৰহন্ত!
বিংশতি দিবসমানে চলিয়া গৈলন্ত॥
তাতে আছে কোমল মলয়া চল পাই।
তাত আছে সুৰভি মুনিৰ নিজ ঠাই॥ ১৬৪
তাহাত স্নানিয়া মুণি আশ্ৰমে পশিলা।
ঋষি সমে কতমান দিবস আছিলা॥
তাহাত পাইলন্ত গৈয়া বৰক বনক।
বিশ্বামিত্ৰ আদি কৰি দেখিলা সবাক॥ ১৬৫
সম্যবন পাইলা যাই তাহাৰ পাচত।
পন্থ হেৰুৱাইলা ৰাজ্য সেহি সময়ত॥
উত্তেৰ বহিবে লাগে পশ্চিমে বহিলা।
এতেকেসে তাসম্বাৰ বিপাক মিলিলা॥ ১৬৬
যাৰ যিবা হৈবে গুচাইবেক কোনজনে।
বিধাতা লিখিছে তাক খণ্ডাইবেক কোনে॥
পাঞ্চ পাণ্ডবৰ মহা বিপাক মিলিলা।
ম্লেচ্ছসনা বিনাশিবে হৰিণে আনিলা॥ ১৬৭
