এই পৃষ্ঠাটোৰ বৈধকৰণ হৈছে
ডাকৰ টোপোলা।
(গীত )
(আসাভৈৰবী-ঠুংৰি )
কই যোৱা ডাকোৱাল, খোজ কিয় কোবাল?
জুনুক জুনুক কিনো বাজে?
তোমাৰ সি টোপোলাত চিঠি নামে অসংখ্যাত
কিনো অদভুত বস্তু বাজে?
বিদেশত আছে পতি, ঘৰত ৰইছে সতী,
মৰম বাতৰি কিবা যায়?
বিৰহত পোৰা নাৰী মাগি প্ৰেম-শান্তি বাৰি
প্ৰণয়ীক প্ৰণয় জনায়?
পিতৃৰ সন্দেহ বাৰ্তা, মাতৃৰ ভাবনা চিন্তা,
বন্ধুৰ সাদৰ সম্ভাষণ,
হতাশাৰ আশা-বল, আতুৰৰ চকু-জল,
শোকাৰ্ত্তৰ মধুৰ সাত্বন,
প্ৰভু আদেশ বাণী, ভৃত্যৰ প্ৰাৰ্থনাখিনি,
ৰজাৰ অনুজ্ঞা আজ্ঞাৰাশি;
মনসাগৰৰ নানা গতি, চিন্তা, বিবেচনা,
চিঠিৰূপে কি টোপোলাবাসী?
নহয় টোপোলা সেয়া সংসাৰৰ সৰু কায়া;
পৃথিবীৰ ক্ষুদ্ৰ তাঙ্গৰণ।
কোৱাঁ ডাকোৱাল কাই, হয় নে নহয় যায়
টোপোলাৰূপেৰে নিৰঞ্জন?
[১৮৩১ শক। মাঘ, হাওড়া!]
