পৃষ্ঠা:এজন ডাক্তৰৰ কবিতা.pdf/৯৯

ৱিকিউৎসৰ পৰা
এই পৃষ্ঠাটোৰ বৈধকৰণ হৈছে

তেজৰ ঈদ, তেজৰ হোলী

ভ্ৰষ্ট চিন্তা আৰু শাণিত অস্ত্ৰৰ ধাৰে
মানৱতাক কৰে আঘাট বাৰে বাৰে
ভুপতিত হ’ল আজি
জীৱশ্ৰেষ্ঠৰ নিচান
বেসুৰা, অশ্লীল হ’ল
বিশ্বভাতৃত্বৰ জয়গান।
আজি ভাবিবৰ হ’ল
কৰ্মই ধৰ্ম নে ধৰ্মহে কৰ্ম
মনৰ ছবিখন যে
অতিকে বিভৎস, বিবৰ্ণ;
একৰঙী ডোঙাবোৰ অভিন্ন তেজৰে
দিবলৈকে ঢাকি ঘন ক’লা চাদৰেৰে
অস্তগামী সভ্যতায়ো খৰ-খেদা কৰে। ❖

৮৮ • এজন ডাক্তৰৰ কবিতা