এই পৃষ্ঠাটোৰ বৈধকৰণ হৈছে
মৌপিঁয়া
মৌবাহ খন, আজি মৌৰে ভৰিল
সুস্বাদু মৌ ৰস টোপ টোপ সৰিল
আকাঙ্খিত দুহাতৰ আঁজলি ভৰিল
তেনেতে তোমালৈ মনত পৰিল।
তুমি মোৰ কল্পনাৰ পখী মৌপিয়া
পুৱাৰ কমলা বেলি, সোণালী সন্ধিয়া
চেনেহ সিন্ধু ধাৰা, হিয়া দিয়া নিয়া
নিঃশেষ তুমি বিনে, স্থবিৰ মলয়া।
আহাচোন কাষলৈ পুৰাবলৈ ঠাই
দিয়াচোন আগলৈ দুহাত বঢ়াই
বৈ যাওঁক অমৃত শিৰাই শিৰাই
ধন্য হওঁ ইহলোক মৰ্ত্যকে পাই। ❖
আশঙ্কা
স্নেহৰ কাৰাগাৰত শ্বাসৰুদ্ধ আজি
অন্তৰ্দ্বন্দ্বত কাহিল এক ত্ৰস্ত প্ৰাণ
বেৰৰ জলঙাৰে মুক্ত আকাশ চাই
দীৰ্ঘশ্বাসে লওঁ মই মুক্তিৰ ঘ্ৰাণ।
এধলীয়া এশাৰী পোহৰ চাই ৰওঁ
কিজানিবা দেখো তাতে ইপ্সিত ছবি
নিৰ্জীৱ সময়কে সোধো বাৰে বাৰে
দৃষ্টিত পামনে পুনু পুৱাৰ ৰবি। ❖
৫৬ • এজন ডাক্তৰৰ কবিতা
