পৃষ্ঠা:এজন ডাক্তৰৰ কবিতা.pdf/১৬৪

ৱিকিউৎসৰ পৰা
নেভিগেশ্যনলৈ যাওক সন্ধানলৈ যাওক
এই পৃষ্ঠাটোৰ বৈধকৰণ হৈছে

উৰিলোহেঁতেন মই আনমনা হৈ
আকাশলঙ্ঘী গছৰ মাজে মাজে
নিয়ৰ সনা দূবৰিবনত ৰ’দ লৈ
নোদোকা কেঁচুবোৰেও আছে মোলৈকে ৰৈ
লিখি দিম নাম মোৰ ডাৱৰৰ ভাজে ভাজে।

কিন্তু বন্দী পখীটি! গতিহীন সি
স্থবিৰ, তাৰ সপোনৰ শ্মশানত
তাৰ ছাঁটোৱে চিঞৰি উঠে হঠাৎ
এক বিকট আৰ্তনাদ কৰি
তাৰ পাখিবোৰ চুটিকৈ কটা
ভৰিতো শিকলি বন্ধা অবিচাৰৰ
সেয়ে, সি গান গায় হৈ দুখতে কাতৰ।

বন্দী পখীৰ গানত শুনো যেন
এক ভয়াবহ, কম্পিত, অভিমানী স্বৰ
আনিবলে অজানা এক দুখৰ লহৰ
ক'বলৈ, লাগে প্ৰেম লাগে শান্তি
দূৰৈৰ পাহাৰখনে শুনে পাতি কাণ
আৰু তাৰে সতে সমস্বৰে গায়
কাৰণ, সি গায় স্বাধীনতাৰ গান॥ ❖

(Maya Angelowৰ মূল ইংৰাজী ‘I Know Why The Caged Bird Sings’ নামৰ কবিতাৰ অসমীয়া অনুবাদ।)