পৃষ্ঠা:এজন ডাক্তৰৰ কবিতা.pdf/১০০

ৱিকিউৎসৰ পৰা
এই পৃষ্ঠাটোৰ বৈধকৰণ হৈছে

সিদ্ধান্ত

অচিন বাটত মই এক বিভ্ৰান্ত পথিক
নাজানো কোন বাটে পাম লক্ষ্য সঠিক
ৰঙীণ আলোকসজ্জা সমুখ বাটত
অপ্সৰা দেৱদূতে দলিচা পাৰি দিয়ে
দেৱান্নৰ প্ৰলোভন চকুৰ আগত।
কৰ্ণগোচৰ হয় এক চেপা স্বৰ
নাযাবা সেই বাটে প্ৰতিবন্ধ তৰ্কৰ
বিস্তাৰিত দুচকুত উপবিষ্ট হয়
আন এটি বাট, সুউচ্চ জ্ঞান প্ৰপাট
কোলাহল বিবৰ্জিত, জ্যোতিৰ্ময়
আছে যুক্তিৰ দাম, নিৰ্ভুল, নিৰ্ভয়।
সেই বাটে আগুৱাম নিশ্চয় মই
অস্থিৰ মনটো বান্ধিলো সজোৰ
পৰলোক বহুদূৰ, বাস্তৱ কঠোৰ
‘কৰ্মই ধৰ্ম’ শিৰোগত কৰি লৈ
পাৰ হ’ম কোবাল বৈতৰণী নৈ। ❖

এজন ডাক্তৰৰ কবিতা • ৮৯