এই পৃষ্ঠাটোৰ বৈধকৰণ হৈছে
২১৮
উদ্যোগপৰ্ব্ব।
অল্প পৰাক্ৰমী হীনবল এৰি তয়।
বলৱন্ত বাছি বাছি কৰিলো নিৰ্ণয়॥ ১০১৩
একাদশ অক্ষোহিনী লেখিলোহো আত।
মহা পৰাক্ৰমী আৰো যুদ্ধত শকত॥
পুনৰপি ভীষ্মে বোলে দোৰ্য্যোধন ৰাই।
নৃপতিৰ ধৰ্ম্ম বাপু কহিবো বুজাই॥ ১০১৪
আগবাঢ়ি ঘোৰ ৰণে নুযুজিবে ৰাজা।
যাৱে সমদলে থাকে সেনাপতি প্ৰজা॥
ৰণভূমি এৰি দুই প্ৰহৰ অন্তৰে।
চকি দিয়া তথাতে থাকিব নৰেশ্বৰে॥ ১০১৫
আকে জানি বাপু তই থাকিবি পাচত।
পাণ্ডৱক যুজো মই ঘোৰ সমৰত॥
দোৰ্য্যোধনে বোলে মই নেদেখোহোঁ ভাল।
সমৰ কৰিবে যুধিষ্ঠিৰ মহীপাল॥ ১০১৬
মই কেনে লুকাইয়া থাকিবো পাচ হুই।
লোকে হঠিবেক মোৰ বৈলাখ লাগই॥
হেন শুনি ভীষ্মে বোলে নৃপতি গণক।
শুন শ্ৰুতায়ু বুলিল কাম্বোজ শঠক॥ ১০১৭
বত্ৰিশ হাজাৰ ৰাজা সসৈন্যে জণ্টাই।
দোৰ্য্যোধন ৰাজাক ৰাখিবা সৰ্ব্বদাই॥
