এই পৃষ্ঠাটোৰ বৈধকৰণ হৈছে
১৮১
অসমীয়া মহাভাৰত
প্ৰাণ পৰিশ্ৰমে মই অৰ্থে কৌৰৱৰ।
তযু পুত্ৰ গণ সমে কৰিবো সমৰ॥৮৪৫
আৰো এক কথা কহো শুনা কুন্তী আই।
পুত্ৰ ৰক্ষা নিমিত্তে আসিছা মোৰ ঠাই॥
কৰ্ণ মহাদানীৰ পাশক যিটো যাই।
কদাচিতো জানিবা তাহাৰ ব্যৰ্থ নাই।৮৪৬
কৰ্ণ মহা দানীৰ অদেয় নাহিজানি॥
পাঞ্চ পুত্ৰ দান দিলো লৈযোক গোসানী।
কুন্তী বোলে বাপু যে অক্ষয় হৌক কাই॥
আজিসে জন্মিল পাঞ্চ পুত্ৰ মোৰ ঠাই।৮৪৭
যুদ্ধে নমাৰিলি মোৰ পাঞ্চুটি তনয়।
পুনু সত্য কৰি বোল নথবি সংশয়॥
কৰ্ণে বোলে কুন্তী আবে কথা কহো সাৰ।
মই সমে লেখি পাঞ্চ তনয় তোমাৰ॥৮৪৮
নকুল সহদেৱ ভীম যুধিষ্ঠিৰ চাৰি।
নমাৰিবো তাৰাক যুদ্ধত বলে পাৰি॥
মধ্যম তোমাৰ পুত্ৰ বীৰ ধনঞ্জয়।
তাক পাইলে পুনু ক্ষমা নকৰিবো মই॥৮৪৯
যদ্যপি অৰ্জ্জুনে মোক কৰয় সংহাৰ।
ধনঞ্জয় সমে পাঞ্চ তনয় তোমাৰ॥
