পৃষ্ঠা:আবিষ্কাৰ-দণ্ডিনাথ কলিতা.pdf/১৬২

১৫৪

আবিষ্কাৰ

 সভাত এইটো স্থিৰ হ’ল যে, সম্প্ৰতি স্কুল গাওঁবুঢ়াৰ চ'ৰা- ঘৰত বহিব। যি বোৰ লৰাৰ ৰাতিপুৱা আজৰি আছে সেই বিলাকে পুৱা বেলা আৰু যাৰ দিনত আজৰি নাই সেইবোৰে ৰাতি পঢ়িব। ইচ্ছা কৰিলে ৰাতিৰ স্কুলত ডেকা-বুঢ়ায়ো পঢ়িব পাৰিব। ইফালে ইয়াৰ ভিতৰতে স্কুলঘৰ সজাৰ আয়োজনো চলি থাকিব, পাৰিলে কিছু চান্দাও আদায় কৰিব লাগিব। খৰালি খেৰ-ইকৰা কাটি আনি স্কুলৰ কাম সম্পূৰ্ণ কৰিব লাগিব।
 পণ্ডিতৰ সম্পৰ্কে এয়ে স্থিৰ হ'ল যে তেওঁ কোনো দৰমহা নাপায়; কিন্তু নিচেই দুখীয়াবিলাকৰ বাহিৰে বাকী-বোৰে ঘৰমূৰি দিনে একোটা সিধা দিব। এনেতে গাওঁবুঢ়াই ক'লে,-“এবছৰ পণ্ডিতক মই খুৱাম। মোৰ ঘৰতে থাকিবও পাৰিব। মোৰ ভঁৰালত ধান আছে, বাৰীত শাক-পাচলি, বেঙেনা-জলকীয় আছে, গোহলিত গাই আছে, সৌ ওচৰৰ বিলত মাৰিলেই মাছ পাওঁ। আৰু নো কি লাগিছে! লোণ- তেলকণ হে কিনিব লাগিব। তাত নো কিমান খৰচ পৰিব।”
 গাওঁবুঢ়াক ধন্যবাদ দি সকলোৱে সেই প্ৰস্তাব গ্ৰহণ কৰিলে।
 স্কুল সম্পৰ্কীয় সকলো নিয়ম-প্ৰণালী মাধৱৰ লগত পৰামৰ্শ কৰি আগেয়ে হাবিৰামে প্ৰস্তুত কৰি ৰাখিছিল। এতিয়া তেওঁ সেই বোৰ সভাত পঢ়ি শুনালে আৰু সকলোৱে তাক গ্ৰহণ কৰিলে।