পৃষ্ঠা:অসমীয়া সাহিত্যৰ চানেকি v2p1.pdf/৬০৩

ৱিকিউৎসৰ পৰা
এই পৃষ্ঠাটোৰ বৈধকৰণ হৈছে
৬০৫
ধ্ৰুব চৰিত্ৰ।

হে ৰাজ ৰাজেশ্বৰ   যদি মোক দিবা বৰ
 শুনা তেবে গোচৰ আমাৰ।
কৃষ্ণৰ চৰণ ধ্যান   নুগুচোক সৰ্ব্বক্ষণ
 সুখে যেন তৰোহোঁ সংসাৰ॥
ৰাজাৰ মনৰ কৰ্ম্ম   শুনি পাছে দিগ ৰাজা
 হৌক বুলি দিলা সমিধান।
চাহি আছে নৰপতি   বিমানে সহিতে তৈতে
 তত কালে ভৈলা অন্তৰ্দ্ধান॥
অনন্তৰে ধ্ৰুবে আসি   নিজ নগৰত পশি
 কৰিলন্ত যজ্ঞ বহুতৰ।
দেৱ দ্বিজ পিতৃগণ   সবাৰো সন্তোষি মন
 দিলা ৰাজা দক্ষিণা বিস্তৰ॥
দ্ৰব্য দেশ কাল কৰ্ম্ম  দেৱ যজমান ধৰ্ম্ম
 সমস্তৰে আত্মা নাৰায়ণ।
একচিত্তে ভক্তি কৰি   দেৱৰো দেৱতা হৰি
 আৰাধিয়া তাহান চৰণ॥
যত জীৱ চৰাচৰ   হৰি আত্মা সমস্তৰ
 জানি কাকো হিংসা নকৰন্ত।
উত্তম অধম প্ৰাণি   প্ৰাকৃত লোকক জানি
 যথোচিত ভাবে প্ৰবৰ্ত্তন্ত॥

প্ৰজাকে পুত্ৰকে   সমানে পালন্ত
 নকৰন্ত কোপ তাপ।
দুখী ভিখি দেখি   পোষন্ত পালন্ত
 যেন নিজ মাৱ বাপ॥
শিতলত জল   প্ৰতাপে অনল
 গম্ভীৰে যেন সাগৰ।
দানে কল্পতৰু   জ্ঞানে শুদ্ধগুৰু
 পৰাক্ৰমে পুৰন্দৰ॥