পৃষ্ঠা:অসমীয়া সাহিত্যৰ চানেকি v2p1.pdf/৪৮৭

ৱিকিউৎসৰ পৰা
এই পৃষ্ঠাটোৰ মুদ্ৰণ সংশোধন কৰা হৈছে
৪৮১
বিষ্ণুপুৰাণ।

অচিন্তে অছিলি সবে পৰ ছিদ্ৰ চাই।
সবাকো গিলিলে গৈই মৃত্যু সিংহে পাই।।
কৈত তোৰ ৰাজ্য কৈত সেই ধনজন।
কৈত ভাৰ্য্যা পুত্ৰ কৈত কুটুম্ব সজ্জন।।

ভাতৃ মিত্ৰ ভৃত্য যত নাহিকে লগত।
যত আলচিলি মনে সবে ভৈল হত।।
এবে ৰাজাগণ তোৰ গুচিল চাতুৰী।
বিসাদ কৰিয়া আছ কিয় মুণ্ড ঘূৰি।।

আপুনাৰ কৰ্ম্ম ফল ভুঞ্জিবি আপুনি।
নাহিকে কাহাৰ দোষ চোৱা মনে গুণি॥
কৈৰা মোৰ দূত পাতকিক আসি ধৰ।
নৰকক নিয়া ভাল মতে শাস্তি কৰ।।

ঋষিগণে যেন কৱে শাস্ত্ৰৰ বিহিত।
তাত পৰে আন নকৰিবি আনুচিত।।
এহিমানে ধৰ্ম ৰাজা দিলন্ত প্ৰবোধ।
হৰিক মনত চিন্তি পৰিলন্ত ক্ৰোধ।।

বিষ্ণুৰ মহিমা কোনে চিন্তি পাৱে অন্ত।
আপুনাৰ কৰ্ম্মে বদ্ধ হোৱন্ত অনন্ত।।
নজানো মহিমা আমি বিষ্ণুৰ সম্প্ৰতি।
তান চৰণত মোৰ হোক দৃঢ় মতি॥

প্ৰাণী সমস্তক দেওঁ আমি সন্তোষ।
এহি বিষয়ত মোৰ মৰষিয়ে দোষ।।
তোমাৰেসে আজ্ঞা পালি প্ৰজাক নিয়মে।
হে কৃষ্ণ তযু পদ পঙ্কজত নমো।।

শুনা সভাসদে সবে শাস্ত্ৰৰ মহৎ।
কিসক অচিন্তে আছা মৃত্যুৰ মুখত।।
সংসাৰ অৰণ্য আছা মহা মৃত্যু সিংহ।
নানা ব্যধিগণ ভাৰ ভৈল তাৰ ৰিঙ্গ।।

৬১