এই পৃষ্ঠাটোৰ বৈধকৰণ হৈছে
নৈৰ সৈতে এখন্তেক
ভনীজনীৰ অসুখৰ খবৰ লবলৈ যাওঁতে
মুখামুখী হ’লো তোমাৰ সৈতে
বুকুৰ জলঙাৰে জুমি চাই দেখিলোঁ
এজাক চেলেকণা মাছ
উজাৰ খাই আঁতৰি গ'ল
কাৰোবাৰ পদধ্বনি শুনি
কঁপা কঁপা বৃত্তৰ পৰিধি আঁকি।
তোমাৰ কজলা বুকুৰ নিথৰ পানীত
আচাৰ খাই পৰিলহি সিপাৰৰ
এটি আৰ্ত চিৎকাৰ
পুতুল সাৰে আছনে
আ-ছনে সা-ৰে-?
তুমি মোৰ অসুখীয়া ভনীনে আই
বনঘোষা এফাকিওচোন গুণগুণোৱা নাই।
নে তোমাৰ বুকুত
ঘৰ ভঙা মানুহৰ হাহাকাৰ তপত নিশাহ?
আমাৰ বুকুৱেদি পাৰ হৈ গল
বহু পাৰ ভঙা, গড়া খহনীয়া
আৰু
ছালে পানীকটা নিৰ্মম বাৰিষাৰ ঢল
তথাপিত
জীৱনৰ বেলাভূমি কৰিছোঁ নিৰ্মাণ
তোমাৰ পলসৰ গেৰুৱা বোকৰে।
অনুচ্চ আৰ্তি/ ১৩
