তোমালৈ/ভালুকপুঙ
< তোমালৈ
- ভালুকপুঙ
- টেবুলঘড়ীৰে জীৱন কিমান
- জুখিবা আৰু!
- তাতকৈ বাৰু, এবাছ বোজাই
- আমি গৈ থাকো গীত গাই গাই
- ঘন বননিৰ ধিয়ান ভাঙি :
- ভালুকপুঙ!
- বৰষুণ নাই, আজি জিলমিল
- ৰ'দহে আছে!
- মেলি দি ৰ'দত চুলি বননিয়ে
- কাচোন কাচে ।
- শেলুৱৈয়ে-ঢকা গছৰ বুকুৰ,
- কপৌফুল—
- বুটলিব। যদি
- ব'লা যাওঁ আমি, ভালুকপুঙ!
- ঔ টেঙাবোৰ সৰি সৰি পৰে
- গছৰ পৰা,
- শিলঘৰীয়াই খলকনি তুলি
- বাগৰ মাৰে।
- এবাছ আলহী আহি পাব বুলি
- ৰঙমনে
- শিলৰ চকীত আউজি বহিল
- ভালুকপুঙ ।
.
- পানী ছটিয়াই হাঁহি মাৰি দিয়ে
- ভৰলী ভনী।
- ভৰলী তেনেই খৰখেদা যেন
- ছোৱালীজনী!
- খং উঠে যদি
- একোকে নমনি
- পাৰৰ গছকো চুলি ধৰি তাই
- নিয়ে উটুৱাই।
- আজি খেলিমেলি এবাছ ধেমালি
- বালি চাপৰিত ওপঙি ফুৰে,
- খেনোৱে মিছাতে শিল দলিয়ায়,
- খেনোৰে ৰঙেৰে বিহু-ঢোল বায়,
- সিজা মাংসৰ গোন্ধ-মধুৰ
- আজি অপৰূপ
- ভালুকপুঙ্।
- বালিভাত খাই আমি দলেবলে
- জিৰণীয়া মৌ উভতি আহোঁ,
- এৰা কলপাত গাখীৰৰ টিন্
- তাতে থাকে।
- কেলেণ্ডাৰৰ আৰু এটি পাত
- সুলকি পৰে,
- বালিৰ পাটীত ইচাট-বিচাট-
- ভালুকপুঙ।
- গম্ গম্ ৰাতি হঠাতে ওলাই
- বনৰজাই
- গোজৰণি মাৰি বতাহৰ গোন্ধ
- থমকি শুঙে :
- পানী খাই থকা শুকান জিভাত
- চপ্-চপ্-চপ্ ....
- শুনি সাৰ পায় ৰাতিৰ যখিনী
- ভালুকপুঙ।
- অৰণ্যখন ভালুকপুঙৰ
- হেজাৰ চকুত জুই জ্বলে,
- বালিভাত খায় নিশাচৰ যত
- জন্তুদলে।
- বাঘ, সাপৰ, ফেঁচাৰ বিকট
- ঐক্যতান
- শুনি শালনিৰ ডাঠ বুকুখনো
- শিয়ঁৰি উঠে ৷
- ডিঙিৰ ৰিঙিত হা হা হাঁহি ভৰা
- ভঙুৱা ভকত অকাপাহাৰ !
- হা হা কৰি হাঁহে পূৰ্ণসেৱাৰ
- ঘাই বাইলুঙ ।
- কেঁচা মঙহৰ গোন্ধ-বলিয়া
- ৰাতিৰ জয়াল
- ভালুকপুঙ ৷৷