তোমালৈ/এলবাম
< তোমালৈ
- এলবাম
- কোনো গধূলিত যদি হঠাতে মৌনী হয় মন
- মই উলিয়াই লওঁ সময়ৰ এলবামখন!
- সমুখেদি বৈ যায় দীর্ঘ এক ছবিৰ মিছিল,
- নানাবৰণীয়া হৈ সময়ৰ ভগা কাচ কৰে জিল্ মিল্।
- ৰান্ধনি বেলিৰ ৰ'দে বাঁহনি-চূড়াত যেই সোণ ছটিয়ায়
- বাৰহলিয়াৰ এই নিজান বাটৰ মুখো শেঁতা পৰি যায় ।
- পুৰণি ৰেকৰ্ডবোৰ বাজি থকা ভঙা গ্রামোফোন,
- টানি দিলে বাঢ়ি থকা ৰবৰৰ দৰে এই একেটি জীৱন!
- ঘূৰাই ফিৰাই যেন একেটাই সাধু শুনি অৱসন্ন মন।
- তথাপিতো কোনো কোনো আশ্চর্য মুহূৰ্ত্ত যেন হীৰাৰ আঙঠি হৈ
- বাট উজলায়—
- সময়-শিপিনীটিৰ চঁপাকলি আঙুলি শুৱায় ।
- মনত পৰিছে সেই বিদ্রোহিনী কলিকতা, পছোৱাত খোপা
- খুলি যায়,
- তেজ বয়, ঝনঝন চিচা ভাঙে, আঁঠু লৈ সাথীৰ মুখত
- এটুপি পানী জীৱনৰ পৰম ক্ষণত।
- গাৱৰ পৱিত্ৰ বোকা চঞ্চল ভৰিত সানি লৈ
- পালোগৈ মিৰিচাঙ্ মত্ত বিহুতলী :
- মিৰিয়নী ভনীটিৰ দুচকুত চমকা বিজুলী।
- তেতিয়া সেউজীমন—স্বপ্নময়-
- গাওখন মায়াসনা, জোনাকবুলীয়া—
- তল্বল্ সোৱণশিৰিৰ বুকু 'তলবল অঘৰীৰ হিয়া।
- আনখন ছবি চাওঁ : জাপ জাপ ৰঙা ইস্তাহাৰ
- মুহূর্তে বিলাই দিলোঁ, জোলোঙা উজাৰ৷
- পঢ়ি পঢ়ি মুখবোৰ দপকৈ জ্বলি উঠিছিল,
- প্রতিটি কঠুৱা মুখে হাতীপটি আকাশৰ স্বপ্ন নামিছিল।
- বহুতো ষ্টেচন ছুই বৈ গ'ল জীৱনৰ ট্ৰেন
- বাটে বাটে পৰি ৰ'ল কত পঁজা ধুনীয়া কাৰেঙ,
- নদী, বন, মানিমুনি দুবৰিৰ ঘাঁহ
- শিমলু-ডালত নচা কুৰুৱাৰ বাহ।
- কঁপি উঠে ছবিখন! কাৰ মুখ জাগে,
- স্মৰণৰ দাপোণত বাৰে বাৰে কঁপে অনুৰাগে ?
- তেতিয়া উৎসৱমত্ত, মন্দ্ৰিত প্ৰহৰ—
- সময় নাছিল মুঠে একাষাৰ কথাও ক'বৰ।
- নহল বাচিবলৈ একাঁজলি মৰম-বকুল,
- তথাপিতো বিজয়িনী, হৃদয়ৰ চোতালত চাওঁ
- ৰজনীগন্ধাৰ বন
- উগুলগুল।
- গধুলি গধূৰ কৰে এইদৰে সময়ৰ এলবামখনে,
- সফল বিফল বহু মুহুৰ্ত-মণিৰে গঁথা জীৱনৰ মালা
- দোলে যে সঘনে।
- মৌনী হৃদয়খন শান্ত হব : উঠে নামে ঢৌ নিৰবধি,
- পাৰৰ বালিৰ গ্ৰাসে শুহি নিয়ে কুমকুমবুলীয়া এক
- মদালসা কুহকিনী নদী !